هذه القصيدة بعنوان عند الفورة يبان لحساب من ديوان الزجل في مجال الجد والهزل
عند الفورة يبان لحساب
سعداتك يا اللي قريتي وتصاحبتي مع الكتاب
ما لعبتي ما تفليتي ما عطيتيها للتقشاب
ما شطحتي على الشعبي او الجاز اوالراب
تدخل لبيتك وتسد عليك الباب
عايش غير مع سقراط وارسطو والسياب
تراجع الدروس مع الاصدقاء والصحاب
واليوم حصدت ما زرعت
وكنت احسن وافضل الطلاب
يفتخروا بيك اهلك والاحباب
من بعد ما تعلمت التعلام
وهزيت الشكارة والكتوبة والاقلام
ما تبعت لا المسلسلات لا الافلام
ها انت نلت الوظيفة
من بعد ما كنت تتمناها في. الاحلام
حفظت دروسك والناس في الليل نيام
وانت يا اللي صيفطوك اهلك للعلم تلقى
عطيتيها غير للدوران والتسركيل في الزنقة
والضحك وتقرقيب الناب
والوقوف في راس الحومة والباب
دايع بحالك بحال الكلاب
اليوم ما تصلاح غير شاوش على الباب
ما نفعاتك ندامة ما تعلمت علامة
تبعت غير البوب والشطيح في القهاوي
وليت بحالك بحال الهداوي
وعند المجتمع صفر لا تساوي
و اليوم عند الفورة يبان لحساب
قرا اصاحبي وتصاحب مع الكتاب
وما يهمكش كنت من الشباب او الشياب
ولا تكون في اخلاقك صفيق
كن مع المعلم اوفى صديق
ولا تحرجو او تسبب لو الضيق
وتحلى باحسن الاداب
وصاحب خير الاصحاب
قرا الادب والعلوم .
ولا تجلس حزين مهموم
سعداتك يا اللي قريتي وصاحبتي الكتاب
ما لعبتي ما تفليتي ما عطيتيها للتقشاب
اليوم جالس تاكل في الشوا والكباب
من بعد ما كنت تلبس الدجيل والسبرديلة
وتركب ف الطوبيس او شي كرويلة
باش توصل للمدرسة في الميعاد
وتتبهدل شر تبهديلة
ها انت اليوم نلت احسن منصب وحظيت بالاعجاب
ما همك تمشي تقرا بالكوستيم او الجلباب
وانت يا اللي خليتي القرايا وتبعتي البنات
حياتك مشات خسارة ، تقيال وتبات
تتاسف وتتحسر على اللي فات
وعند الفورة يبان لحساب
بقلم الدويدة عبدالرزاق عن ديوان الزجل في مجال الجد والهزل
٢٠فبراير ٢٠١٨
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.